Словенија е планинска земја која се наоѓа под Алпите. Таа е држава во Средна Европа, која се граничи со Италија на запад, Јадранското Море на југозапад, Хрватска на југ и исток, Унгарија на североисток и со Австрија на север.
Словенија беше дел од поранешна Југославија од 1945. до 1991. кога се избори за независност. Стана членка на Европската Унија на 1 мај 2004. Таа е исто така член на Советот на Европа, НАТО и има набљудувачки статус во франкофонските држави.
На Словенија и припаѓа и мал дел од јадранското крајбрежје во должина од 47 км. Од приморските градови најпознати се Порторож, Пиран, Изола и други кои секоја година привлекуваат голем број на туристи од западноевропските земји.
Словенија е земја која изобилува со голем број на природни убавини кои придонесуваат за развој на туризмот во оваа земја. Позната е по многубројните скијачки терени. Едни од најпознатите се на Мариборкото Похорје. Познати се достапните и словенските бањи (топлици) во кои има многубројни базени со ладна и топла вода и се привлечни не само за медицински цели, туку и за рекреативни, особено помеѓу младите. Една од најубавите природни богатства на Словенија се езерата Блед и Бохињ. Тука се наоѓа и малиот остров со црква во него, кој е еден од заштитните белези на оваа земја.
Словенците се нација кои важат за трудољубили луѓе. Тие се горди на својата работа и резултатите кои произлегуваат како нејзина последица. Во Словенија се доста познати и крањските колбаси, прекуморската гибаница и традиционалнито словенечко јадење од кисела зелка, грав и свинско месо.
Во Словенија се присутни четири географски региони на Европа: Алпите, Динаридите, Панонската Низина и Средоземјето. Највисок врв во Словенија е Триглав со 2 864 метри и просечната надморска височина е 557 метри. Иако е во близина на Средоземното Море, реките на Словенија се од црноморското сливно подрачје. Брегот на Словенија изнесува околу 47 километри.
Половина од територијата на Словенија е покриена со шуми - таа е трета држава во Европа по шумска површина. Климата на Словенија е средоземна во крајбрежниот регион, алпска клима во планините и континентална во остатокот на земјата.
Името Словенија значи „Земја на Словенците“ на словенечки и на други јужнословенски јазици. Самото значење на „слово“, е „збор и говор“, а Словенците етимолошки се „луѓе кои (разбирливо) зборуваат“.
Ако барате совршена зелена и безбедна оаза, ова е вистинското место за вас. Словенија е зеленото срце на Европа, каде секој може да најде нешто за себе. Тешко е да се најде толку мал регион кој изобилува со толку богатства на друго место во светот. Без разлика дали уживате да пешачите по добро изгазени патеки или претпочитате кратки патчиња, каде и да одите ќе најдете неверојатни убавини и мноштво искуства скроени само за вас.