Патмос Островот на Откровението

Состанок на групата во 20:30 часот на паркингот пред СЦ „Борис Трајковски“ во Скопје. Заминување кон Грција во 21:00 часот преку граничниот премин Богородица-Евзони. Ноќно возење со попатни застанувања и одмори.

Пристигнување во Атина во утринските часови. Панорамски разглед на градот и посета на местото Аеропаг, на кое што проповедал Свети Апостол Павле при неговото доаѓање во Атина. Посета на дел од византиските цркви во подножјето на древниот Акропол и местноста Плака.

Слободно време за индивидуални прошетки и посети низ Атина, до заминување кон пристаништето Пиреа. Испловување на бродот кон островот Патмос во 18:00 часот. Ноќно пловење.

Во раните утрински часови 02:10, пристигнување на островот Патмос. По симнување од бродот, краток одмор до заминување во манастирот посветен на Светиот апостол Јован Богослов. Присуство на Светата литургија во тамошната црква и разглед на манастирот, основан во 1088 година од Свети Христодул од Витинија.

Сместување во хотел и слободно време за одмор. Во попладневните часови разглед на островот кој е дел од најдалечните кикладски острови во егејското море. Со површина од 34 км² и население од околу три илјади жители, во христијанскиот свет е многу познат како „Островот на Откровението“ или како „Егејскиот Ерусалим“.

Во времето на Римската империја Патмос бил „остров на прогонетите“. Тука во 95 г.н.е. од Ефес бил протеран и „Апостолот на љубовта“ – Свети Јован Богослов. Ноќевање.

Појадок. Во раните утрински часови, посета на Пештерата на Откровението во која Светиот апостол Јован Богослов ја пишувал последната книга на Новозаветниот канон – Откровение или Апокалипса. Единствена можност за присуство на Светата божествена литургија во пештерната црква.

Во продолжение на денот, посета на манастирот Благовештение – изграден над монументалните карпи на југозападната страна од селото Хора. Поклонение во црквата на Благовестието, подигната во 1613 година од монахот Никифор Критски, собрат од манастирот Св. Јован Богослов.

Црквата во 1937 година, од страна на големиот духовник јеромонахот Амфилохије Макрис, е претворена во прекрасен манастир кој живее и денес. Слободно време за одмор и индивидуални активности до полноќното заминување од островот Патмос. Ноќно пловење.

Во 00:15 часот по полноќ, испловување на бродот со ноќно пловење кон Атина. Пристигнување на пристаништето Пиреа во 08:25 часот наутро. Краток одмор до продолжување на патувањето кон Македонија. Дневно возење со попатни застанувања и одмори. Пристигнување во Скопје во вечерните часови.